Það er ljóst af þeirri kosningastefnuskrá, sem frambjóðendur Sjálfstæðisflokksins til borgarstjórnar Reykjavíkur kynntu í gær, sunnudag, að þar fer hópur ungs fólks með hugmyndir.

Þau setja fram ákveðnar hugmyndir um framboð á nýjum byggingarlóðum og líka hugmyndir um aðgerðir í samgöngumálum en báðir þessir málaflokkar eru einna efst á baugi í umræðum um borgarmál.

Hugmyndir þeirra um að ný miðstöð í samgöngumálum verði á Kringlusvæðinu eru skemmtilegar og skynsamlegar og minna reyndar á hugmyndir, sem uppi voru í árdaga uppbyggingar á því svæði um nýjan miðbæ þar.

Fækkun borgarfulltrúa úr 23 í 15 er auðvitað sjálfsögð og merkilegt að Sjálfstæðisflokkurinn skuli þurfa að berjast fyrir því aftur og aftur.

Fyrirheit um leikskólapláss frá 12 mánaða aldri minnir á að fögur fyrirheit vinstri manna frá því fyrir aldarfjórðungi í þeim efnum eru fjarri því að hafa gengið upp. 

Þetta er góð byrjun, sem lofar góðu.