Helzti boðskapur frá landsþingi Viðreisnar virðist vera sá að efna eigi til þverpólitísks samstarfs til þess að auka á innlimun Íslands í Evrópusambandið!

Dettur einhverjum í hug að jarðvegur sé fyrir því?

Evrópusambandið sjálft er í tilvistarkreppu. Austurhluti þess er í uppreisn gegn Brussel. Ítalía, þriðja stærsta efnahagskerfið innan ESB veitti andstæðingum og efasemdarmönnum um ESB og evruna brautargengi í kosningum fyrir skömmu.

Í norðurhluta Evrópu er komið upp andóf gegn hugmyndum Frakka og Þjóðverja um þróun þessa samstarfs og um evruna sérstaklega.

Í Noregi er vaxandi andstaða við EES-samninginn óbreyttan.

Sú andstaða á líka eftir að vaxa hér á Íslandi, þegar fólk fer að átta sig betur á til hvers hann er að leiða.

Það þverpólitíska samstarf sem tilefni er að efna til snýr að endurskoðun EES-samningsins.