Í fyrsta hefti þessa árs af tímaritinu Nordisk Tidskrift, sem út er komið, er að finna grein um Matthías Johannessen, sem lengst allra var ritstjóri Morgunblaðsins eða í rúmlega 41 ár. Greinin er eftir umsjónarmann þessarar síðu og er þáttur í greinaflokki um ritstjóra á Norðurlöndum.

Í grein þessari held ég því fram, að Matthías Johannessen hafi verið áhrifamesti fjölmiðlamaður á Íslandi á síðari hluta 20. aldar.

Hann hafi á "ísöld" kalda stríðsins opnað á samskipti til vinstri á vettvangi menningarlífsins með viðtalsbók við Þórberg Þórðarson, sem hafi orðið klassísk í íslenzkum bókmenntum okkar tíma og með því að leiða Halldór Laxness inn á síður Morgunblaðsins en þetta frumkvæði Matthíasar hafi orðið undanfari þeirrar byltingar, sem varð í fjölmiðlun á þeim tíma, þegar Morgunblaðið varð vettvangur skoðanaskipta fólks úr öllum flokkum.

Þá er fjallað um frumkvæði Matthíasar að kvótapólitík Morgunblaðsins en skrif blaðsins áttu umtalsverðan þátt í upptöku auðlindagjalds. Um það segir m.a. í greininni í Nordisk Tidskrift:

"Óhikað má fullyrða að fyrir utan átökin í kalda stríðinu og baráttuna fyrir útfærslu fiskveiðilögsögunnar, hafi kvótamálið verið stærsta samfélagsmálið, sem um var deilt á Íslandi frá lýðveldisstofnun."