Þær fréttir, sem hafa verið að birtast hjá RÚV síðustu daga um stöðu mála hjá heilabiluðum eru grafalvarlegar. Samkvæmt þeim eru um 200 manns á biðlistum á höfuðborgarsvæðinu eftir dagvistun og biðtíminn 12-15 mánuðir. 

Þessi staða er samfélagi okkar til skammar.

Álagið sem fylgir þessari stöðu á heimilum er gífurlegt. Stundum fellur það álag allt á maka. Stundum er enginn slíkur til staðar til þess að annast hinn heilabilaða. Þá verða börn eða aðrir ættingjar að koma til sögunnar, fólk, sem oftar en ekki þarf að sinna daglegri vinnu til að sjá sér og fjölskyldum sínum farborða.

Hvernig dettur stjórnvöldum í hug að láta sem ekkert sé?

Þetta ástand kallar á aðgerðir þegar í stað. Vonandi taka þingmenn til hendi við upphaf þings á næstunni og krefjast svara frá ráðherrum um, hvað þeir ætli að gera.

Það er óhugsandi að ekki verði brugðizt við.