Eitt furðulegasta mál seinni ára í utanríkismálum okkar Íslendinga, er meðferð ríkisstjórnar Framsóknarflokks og Sjálfstæðisflokks fyrir bráðum fimm árum á aðildarumsókn Íslands að ESB, sem samþykkt var á þingi sumarið 2009. 

Sú ríkisstjórn heyktist á að leggja fyrir þingið tillögu um formlega afturköllun aðildarumsóknarinnar en hélt því fram, að það hefði verið gert með bréfi þáverandi utanríkisráðherra til ESB.

Þá þegar var ljóst að það var tilbúningur - vísvitandi blekking. Aðildarumsóknin var ekki dregin til baka með formlegum hætti heldur lögð í skúffu í Brussel til notkunar síðar.

Hvað veldur því, að núverandi ríkisstjórn upplýsir ekki Alþingi um hvað raunverulega gerðist. Allar upplýsingar um það hljóta að vera til staðar í utanríkisráðuneytinu. 

Ætla þeir, sem hér koma við sögu að láta þetta mál óupplýst í lýðræðislegu samfélagi og sitja sjálfir uppi með skömmina eftir nokkur ár eða áratugi, þegar þeir verða ekki lengur í aðstöðu til að viðhalda leyndinni?

Hvað gerðist í þessu máli veturinn 2015?