Ef eitthvert eitt orð getur lýst ástandinu á heimsbyggðinni um þessar mundir er það orðið óvissa. Enginn veit hvað framundan er. Enginn veit hvað við tekur. 

En eitt er þó víst. Samfélög manna verða ekki söm og áður. Það er líklegra en hitt að gildismat okkar breytist og að þau samfélög ofurneyzlu, sem orðið hafa til, ekki sízt á Vesturlöndum, muni smátt og smátt hverfa eða a.m.k. láta undan síga.

Það er út af fyrir sig jákvætt. Og getur m.a. hjálpað okkur vegna loftslagsbreytinga.

Kannski þurfti mannfólkið að verða fyrir svona áfalli til þess að ná áttum.

Saga hinna evrópsku nýlenduvelda er ljót og þau reyna hvað þau geta til að sú saga gleymist.

En tímabil ofurneyzlu á Vesturlöndum á sama tíma og fjölmennir hópar þjást af fátækt í öðrum heimshlutum er líka ljótt.

Er hugsanlegt að kórónuveiran opni augu okkar fyrir því?