Reglulega birtast fréttir, sem vekja upp spurningar um það, hvort skortur sé á kennslu í mannlegum samskiptum. Slíkar fréttir berast af vinnustöðum eða af einhverjum þeim vettvangi, þar sem fólk starfar saman. Þær eru ekki bundnar við Ísland eitt. Eitt nýjast dæmið er af samskiptum tveggja þingmanna á Bandaríkjaþingi, þar sem karlkyns þingmaður sýndi kvenkyns þingmanni dónaskap.

Oft benda lýsingar á samskiptum fólks til þess mannfólkið búi enn í frumskógi, bara annars konar frumskógi heldur en áður.

Í gamla daga var sagt að þessi eða hinn kynni ekki "mannasiði".

Kannski hefur þetta alltaf verið svona en veki meiri athygli nú vegna þess að oftar sé frá því sagt eða einfaldlega að fólk sætti sig ekki lengur við framkomu annarra og segi þess vegna frá.

Alla vega er hér um vandamál að ræða, sem taka þarf á.

Kannski er leiðin til þess tvíþætt. Annars vegar að taka upp reglulega kennslu í skólum í mannlegum samskiptum. 

Hins vegar að hefja víðtækari umræður um slík vandamál á opinberum vettvangi.

Slíkar umræður eru ákveðin uppeldisaðferð.