Ítarlegt viðtal Andrésar Magnússonar við Katrínu Jakobsdóttur, forsætisráðherra, í Morgunblaðinu í dag vekur upp þessa spurningu:

Er ekki farsælast fyrir land og þjóð að núverandi stjórnarsamstarf haldi áfram að kosningum loknum?

Það fer ekki á milli mála, að samstarf stjórnarflokkanna þriggja hefur í stórum dráttum gengið vel. Óvenjulegar aðstæður valda því, að það skiptir miklu máli að pólitískur stöðugleiki ríki á meðan tekizt er á við þann risavaxna vanda, sem við og allar aðrar þjóðir stöndum frammi fyrir á næstu árum.

Það væri óheppilegt svo ekki sé meira sagt, að pólitískt uppnám ríki í landinu að kosningum loknum haustið 2021.

Auðvitað er forsendan fyrir því að það geti haldið áfram sú, að flokkarnir þrír haldi meirihluta sínum á Alþingi. Líkurnar á því eru töluverðar, því ekki er að sjá að einhver stjórnarandstöðuflokkanna sé að ná sér á strik - nema þá hugsanlega Píratar.

Núverandi stjórnarflokkar hafa staðið vel saman í aðgerðum vegna kórónuveirunnar.

Þeir búa yfir þekkingu og reynslu, sem skiptir máli.

Það eru sterk rök, sem hníga að því að treysta þeim áfram fyrir landstjórninni.