Danska sjónvarpið hefur hafið útsendingu á þáttaröð um börn, sem eiga foreldri með geðröskun. Í upphafi hennar kemur fram, að um 300 þúsund börn í Danmörku búa við slíkar aðstæður.

Í fyrsta þættinum kemur fram, að geðdeild sjúkrahússins í Álaborg á Jótlandi hefur hafizt handa við að sinna þessum börnum. Það er gert með samtölum við barnið og foreldra þess og með því að leiða saman börn, sem eiga sér sambærilega lífsreynslu að þessu leyti.

Hér er á ferð hópur barna, sem hafa ekki fengið nægilega athygli til þessa. Þó ber að geta þess, að í þingsályktun  Alþingis, sem samþykkt var fyrir nokkrum árum, er ákvæði, sem varðar þessi börn sérstaklega og á seinni árum hefur geðheilbrigðiskerfið hér stigið fyrstu skrefin til þess og það gerðist raunar áður en umrædd þingsályktun var samþykkt á Alþingi.

Fyrsti þátturinn í danska sjónvarpinu bendir til þess, að við getum ýmislegt af Dönum lært í þessum efnum. Þess vegna er ástæða fyrir fagfólk á þessu sviði að kynna sér það, sem er að gerast í þessum efnum í Danmörku.