Mikill mannfjöldi mótmælti fangelsun rússneska andófsmannsins Alexei Navalnys í borgum um allt Rússland í gær. Til átaka kom á milli fólksins og lögreglunnar og töluverður fjöldi fólks var hnepptur í fangelsi, þar á meðal eiginkona Navalnys og ýmsir samstarfsmenn hans, konur og karlar. Frá þessu er sagt m.a. á rússneska netmiðlinum, The Moscow Times.

Navalny var settur í fangelsi við komuna heim til Rússlands fyrir skömmu frá Þýzkalandi en þangað var hann fluttur meðvitundarlaus eftir að tilraun hafði verði gerð til þess að eitra fyrir honum.

Augljóst er að yfirvöld í Rússlandi óttast Navalny mjög, þótt hvorki ráði hann yfir her eða lögreglu.

Að nafninu til ríkir lýðræði í Rússlandi en í raun er það eins konar KGB-ríki að mati sumra en mafíuríki að mati annarra, sem til þekkja, sem segja að spurningin sé bara sú, hvaða mafía verði ofan á í átökum þeirra í milli um hver taki við af Pútín, þegar hann hætti.

Ótti ráðamanna við Navalny byggist á því að dag einn verði mótmæli af þessu tagi svo víðtæk að jafnvel þeir, sem ráða yfir her og lögreglu, ráði ekki við neitt og þeim sem ráða verði velt úr sessi.

Fréttakona þýzku fréttastofunnar Deutsche-Welle, Emily Sherwin, í Moskvu segir að fólkið úti á götum þar hafi hrópað:

"Við höfum völdin hér".