Næstu mánuðir verða erfiður tími fyrir marga stjórnmálamenn. Nú er komið að því, að þeir verða að leggja störf sín síðustu fjögur ár undir dóm kjósenda. Sumir verða að ganga í gegnum prófkjör í eigin flokkum áður en kemur að kosningunum sjálfum og aðrir verða að sæta mati uppstillinganefnda á því hvernig þeir hafi staðið sig.

Reynslan sýnir að eitt helzta vandamál þingmanna er ofmat þeirra á sjálfum sér. Margra ára seta á Alþingi virðist hafa þau áhrif á einstaklinga að þeir tapa áttum og gera sér enga grein fyrir eigin stöðu í augum kjósenda. Að ekki sé talað um þá, sem fá tækifæri til að taka sæti í ríkisstjórn.

Áhrifamáttur valdsins blindar þeim sýn.

Sumir þeirra hafa að vísu vit á, að rækta tengslin við kjósendur og virka flokksmenn milli kosninga en aðrir gleyma því fljótt enda mikil vinna.

Ofmatið á eigin stöðu framkallar svo stundum furðuleg viðbrögð hjá þingmönnum, þegar kemur að vali flokka á frambjóðendum.

Ein af ástæðunum fyrir því, að þingmenn missa tengslin við veruleikann í kringum sig er sú að samstarfsmenn og vinir hafa tilhneigingu til að segja þeim það sem þeir vilja heyra.

En beztu vinir stjórnmálamanna eru einmitt þeir, sem segja þeim sannleikann um stöðu þeirra meðal flokksmanna eða kjósenda, þótt hann kunni að vera þeim erfiður.