Fréttir fyrir skömmu um að skotið hefði verið á rúður á skrifstofum Samfylkingarinnar í Reykjavík og að hið sama hefði gerzt í Valhöll, höfuðstöðvum Sjálfstæðisflokksins, vöktu óhug.

Þegar fréttir bárust um að skotið hefði verið á bifreið Dags B. Eggertssonar, borgarstjóra, vaknaði sú hugsun áreiðanlega hjá mörgum, hvort verið gæti að verri tímar væru framundan á Íslandi.

Eitt er að fólk skiptist á skoðunum og deili um mál í lýðræðisríki. Annað að skoðanaágreiningur leiði til ofbeldisverka.

Reyndar eru fleiri atvik, sem hafa vakið upp áþekkar hugleiðingar eins og t.d. eins konar innrás í Borgarholtsskóla, þar sem markmiðið var að berja á einstaklingi.

Hvað er að gerast?

Eru þetta áhrif og afleiðingar ómenningarstrauma frá öðrum löndum?

Að vísu hafa slagsmál karla lengi verið viðloðandi okkar fámenna samfélag. Fyrir rúmlega hálfri öld voru þau algeng á skólalóðum í frímínútum á milli stráka og á íþróttamótum og hestamannamótum í Borgarfirði um miðja síðustu öld voru slagsmál bændasona eins konar "skemmtiatriði" á slíkum mótum. Fólk horfði á en stöðvaði ekki.

En nú eru alvarlegri mál á ferðinni, þar sem hafnaboltakylfum, hnífum og skotvopnum er beitt.

Það er rík ástæða til að taka undir með borgarstjóra að þessa þróun verður að stöðva.