Hádegistónleikar á Kjarvalsstöðum, sem Guðný Guðmundsdóttir, fiðluleikari er listrænn stjórnandi að, auka vægi Kjarvalsstaða í menningarlífi höfuðborgarinnarn svo um munar.

Í gær var Atla Heimis Sveinssonar, tónskálds, sem lést fyrir skömmu, minnst á slíkum tónleikum fyrir fullu húsi. Það sem vakti ekki sízt athygli þess áheyranda, sem hér skrifar var, að þar var hin undurfagra Vókalísa Rachmaninoffs flutt en fegurðin í þeim verkum Atla Heimis, sem voru flutt á tónleikunum var engu minni, en það var Intermezzo úr Dimmalimm og þrjú sönglög úr Jónasarlögum Atla.

Auk Guðnýjar komu fram á tónleikunum þær Hildigunnur Einarsdóttir, mezzosópran og Jane Ade Sutarjo, píanóleikari.

Fyrir skömmu voru hér á ferð erlend hjón, sem víða hafa komið, og höfðu orð á fjölskrúðugu tónlistarlífi á Íslandi og spurðu, hvernig það hefði orðið til.

Einn viðmælandi þeirra svaraði: Það voru Gyðingarnir.

Og áttu við þá flóttamenn af gyðingaættum, sem flúðu hingað undan ofsóknum nazista fyrir um átta áratugum og áttu mikinn þátt í að byggja upp tónlistarlífið hér. 

Fyrsti tónlistarkennari Atla Heimis, var einmitt einn úr þeirra röðum, dr. Heinz Edelstein.